Acts 15

1¶ Na sampela man husat i kam daun long Judia i skulim ol brata, na tok, Sapos yupela i no katim skin i bihainim pasin bilong Moses, God i no inap kisim bek yupela. 2Olsem na taim Pol na Banabas i gat kros pait i no liklik na tok pait wantaim ol, ol i pasim tok long Pol na Banabas, na sampela arapela bilong ol, i mas go antap long Jerusalem long ol aposel na ol lapun hetman long sait bilong dispela askim. 3Na taim sios i bringim ol long rot bilong ol, ol i wokabaut namel long Fenis na Samaria, na tokaut long ol man i no Ju i bin senisim bilip. Na ol i mekim bikpela amamas tru long kamap long olgeta brata. 4Na taim ol i kam long Jerusalem, sios i kisim ol, na ol aposel na ol lapun hetman i kisim ol, na ol i tokaut long olgeta dispela samting God i bin mekim wantaim ol. 5Tasol i gat sampela bilong lotu lain bilong ol Farisi husat i bilip i kirap, i spik, Long em i gat nid long katim skin bilong ol, na long tok strong long ol long bihainim lo bilong Moses. 6¶ Na ol aposel na ol lapun hetman i kam bung wantaim bilong tingim na skelim dispela samting. 7Na taim i bin gat planti tok pait, Pita i kirap, na tokim ol, Ol man na ol brata, yupela save olsem long longpela taim liklik bipo God i bin makim wanpela namel long yumi, inap long ol man i no Ju, long maus bilong mi, i ken harim tok bilong gutnius, na bilip. 8Na God, husat i save long ol bel, i givim witnes long sait bilong ol, taim em i givim Holi Spirit long ol, yes, olsem em i mekim long yumi. 9Na em i no putim mak i narakain namel long yumi na ol, taim em i klinim ol bel bilong ol long bilip tru. 10Olsem na nau bilong wanem yupela i traim God, long putim wanpela yok antap long nek bilong ol disaipel, dispela ol tumbuna papa bilong yumi na tu yumi i no bin inap long karim? 11Tasol yumi bilip, long wok bilong marimari bilong Bikpela Jisas Kraist, God bai kisim bek yumi, yes, olsem ol. 12Nau olgeta bikpela lain tru i pasim maus, na givim ia long Banabas na Pol, taim ol i tokaut long wanem ol mirakel na ol samting bilong winim tingting God i bin wokim namel long ol man i no Ju long han bilong ol. 13Na bihain long ol i bin pasim maus bilong ol, Jems i bekim tok, i spik, Ol man na ol brata, harim long mi. 14Simion i bin tokaut long God i bin go lukim ol man i no Ju pastaim olsem wanem, long kisim ausait long ol wanpela lain manmeri bilong nem bilong em. 15Na long dispela ol toktok bilong ol profet i wanbel, olsem rait i stap pinis, 16Bihain long dispela mi bai kam bek, na mi bai wokim gen haus holi bilong Devit, dispela i pundaun pinis. Na mi bai wokim gen ol bagarap bilong en, na mi bai sanapim dispela. 17Inap long lain i stap yet bilong ol man i ken painim i bihainim Bikpela, na olgeta man i no Ju, antap long husat ol i kolim nem bilong mi, Bikpela i tok, husat i mekim olgeta dispela samting. 18God i save long olgeta wok bilong em i stat long stat bilong dispela graun. 19Olsem na tingting bilong mi i olsem, long yumi no ken givim wari long ol, husat long namel long ol man i no Ju i tanim i go long God pinis. 20Tasol long yumi rait i go long ol, long ol i mas stap longwe long ol pasin doti bilong ol piksa bilong god giaman, na long pamuk pasin, na long ol samting ol i pasim nek bilong kilim, na long blut. 21Long wanem, Moses long taim bipo i bin gat long olgeta wan wan biktaun ol man husat i autim tok long sait bilong em, taim ol i ritim long em long ol sinagog olgeta wan wan de sabat. 22¶ Nau dispela i amamasim bel bilong ol aposel na ol lapun hetman, wantaim sios olgeta, long salim ol man ol i makim bilong lain bilong ol yet long Antiok wantaim Pol na Banabas, nem bilong ol, Judas husat i gat narapela nem Barsabas, na Sailas, ol nambawan man namel long ol brata. 23Na ol i raitim ol pas long han bilong ol i bihainim dispela kain, Ol aposel na ol lapun hetman na ol brata i salim gude long ol brata husat i bilong ol man i no Ju long Antiok na Siria na Silisia. 24Bikos mipela i bin harim, long i gat sampela husat i lusim mipela i bin givim wari long yupela wantaim ol toktok, taim ol i paulim ol tewel bilong yupela, i spik, Yupela i mas katim skin, na bihainim lo. Mipela i no givim kain tok strong olsem long ol. 25Em i luk olsem em i gutpela long mipela, taim mipela i bung wantaim wanpela bel, long salim ol man mipela i makim i go long yupela wantaim Banabas na Pol, husat i stap klostu tru long bel bilong mipela, 26Ol man husat i bin klostu long lusim ol laip bilong ol bilong tingim nem bilong Bikpela bilong yumi Jisas Kraist. 27Olsem na mipela i bin salim Judas na Sailas, husat tu bai tokim yupela ol dispela samting stret long maus. 28Long wanem, em i luk olsem em i gutpela long Holi Spirit, na long mipela, long mipela i no ken putim bikpela hevi long yupela moa long ol dispela samting i gat nid, 29Long yupela i mas stap longwe long ol kaikai ol i ofaim long ol piksa bilong god giaman, na long blut, na long ol samting ol i pasim nek bilong kilim, na long pamuk pasin. Long ol dispela, sapos yupela i pasim yupela yet, yupela bai mekim gutpela. Yupela stap gutpela. 30Olsem na taim sios i salim ol i go, ol i kam long Antiok. Na taim ol i bin bungim dispela bikpela lain tru wantaim, ol i givim dispela pas long ol. 31Taim ol i bin ritim dispela pinis, ol i wokim amamas tru long bel isi ol i kisim. 32Na Judas na Sailas, husat i stap ol profet ol yet tu, i strongim bel bilong ol brata wantaim planti toktok, na strongim ol. 33Na bihain long ol i bin stap yet long dispela hap liklik taim, ol i larim ol i go wantaim bel isi i lusim ol brata bilong go long ol aposel. 34Tasol em i amamasim bel bilong Sailas long stap yet long dispela hap. 35Pol tu na Banabas i stap yet long Antiok, taim ol i skulim na autim tok bilong Bikpela, wantaim planti arapela tu. 36¶ Na sampela de bihain Pol i tokim Banabas, Yumi go gen na lukim ol brata bilong yumi long olgeta wan wan biktaun we yumi bin autim tok bilong Bikpela, na luksave long ol i stap olsem wanem. 37Na Banabas i strong long kisim John i go wantaim ol, husat narapela nem bilong em em Mak. 38Tasol Pol i no ting em i gutpela long kisim em i go wantaim ol, husat i bin lusim ol long Pamfilia, na i no go wantaim ol long wok. 39Na dispela strongpela pait i sap olsem namel long ol, inap long ol i bruk i go long tupela hap, wanpela i lusim arapela. Na olsem na Banabas i kisim Mak, na ran long sip i go long Saipras. 40Na Pol i makim Sailas, na go, taim ol brata i givim tupela i go long marimari bilong God. 41Na em i go long Siria na Silisia, na strongim ol sios.